Reynt var að fá eitthvað vit í gögn úr B flokk þar sem talið var að hringur 3 og 4 væru eðlilegir. Hinsvegar eru þær upplýsingar ekki réttar þar sem hringur 1 og 2 (þegar rafmagnið fór af) hafa bein áhrif á millitímana í næstu hringjum og um leið stöðu keppanda. Við nákvæma skoðun eru því overall úrslitin þau einu sem hægt er að birta. Allt annað væri steypa. Keppendur í B flokk verða því að ganga með vasaklút næstu daga til að þurka tárin.
Greinasafn fyrir flokkinn: Fréttir
Þetta er aðalflokkurinn
Bilun hjá Heimsnet
Vefsíða þessi er geymd hjá Halló Heimsnet og er búin að vera ýmist hægvirk eða ekki hægt að nálgast hana síðustu 2 daga. Tölvukallinn hafði upphaflega samband við þá á þriðjudagsskvöldið, aftur á miðvikudaginn og sprakk síðan kl. 17 í dag og hellti úr sínum viskubrunni yfir þá. Tóku þeir kipp og fundu bilun í „router“ Halló Heimsnet sem var kippt í lag. Ljósleiðari hafði farið í sundur á þriðjudaginn og var gerð bráðabirgða breyting á routernum sem síðan truflaði allt samband eftir að ljósleiðarinn komst í lag en gleymst hafði að breyta routernum tilbaka. Bilun þessi var ekki einskorðuð við þennan vef heldur alla vefi sem geymdir eru hjá þeim en enginn hafði kvartað nema tölvukallinn. Vefurinn fékk því sinn eðlilega hraða kl. 18 í dag og tölvukallinn fékk margfaldar þakkir fyrir að hafa verið svona ýtinn og leiðinlegur sem varð síðan til að bilunin fannst og fékk hann loforð um að hlustað verði á hann næst þegar hann opnar munninn. Vonandi hafa sem fæstir orðið fyrir óþægindum.
Skráning í næstu keppni
Nú er komið að skráningu í keppni tvö af þrem til Íslandsmeistara í enduro. Keppnin verður haldin við Litlu Kaffistofuna rétt utan við Reykjavík. Fyrirkomulag skráningar er það sama og verið hefur nema til viðbótar geta menn nú skráð sig á vefnum. Nánari upplýsingar er að sjá undir „Dagatal og úrslit“ hér til hliðar. Athugið að allar upplýsingar eru veittar á „need to know basis“ þannig að mæting klukkan og fleira birtist síðar. Þess má geta að eftir síðasta „fellibyl“ tók VÍK þá ákvörðun að gefa öllum mx verslunum kost á að sjá um skráningu í keppnirnar, þó einni í einu. Verslun Vélhjól_og_Sleðar mun sjá um skráningu í þess keppni.
Hjólasýning um helgina
Þetta ætlar að verða með betri helgum fyrir þá sem eru fastir í bænum. Verslunin Moto er með hjólatúr á laugardaginn. Verslunin Vélhjól & Sleðar er með annan hjólatúr á sunnudaginn og síðan er hægt að fleyta rjómann ofanaf og kíkja á sýningu hjá Suzuki umboðinu frá 10-16 á laugardaginn og frá 13-17 á sunnudaginn. Meðal þess sem kynnt verður er nýr RM250 og RM125 ásamt DR-Z400E (nýr litur), fjórhjól og hefbundin götuhjól og hippar.
Bæjaryfirvöld í Mosfellsbæ
MotoMos er að tækla bæjaryfirvöld vegna afnota af landi. Meðfylgjandi er svar Bæjaryfirvalda ásamt athugasemdum frá MotoMos.
Bréf frá Mosfellsbæ til MotoMos.
Málefni: Erindi vélhjólaklúbbsins MotoMos um afnot af landi á Leirvogstungumelum.
Á 29, fundi skipulags og bygginganefndar Mosfellsbæjar 29 mai 2001 var fyrirspurn yðar til umfjöllunar og svohljóðandi bókun var gerð:
Vísun frá fundi íþrótta og tómstundanefndar þ. 8. mai 2001.
Frestað.
Næsti fundur skipulags og bygginganefnadar verður haldinn þ. 12 júní 2001,
Virðingarfyllst,
f.h. Tækni og umhverfissviðs:
Tryggvi Jónsson, Bæjartæknifræðingur. ( Tilvitn. líkur )
Þetta þýðir á mannamáli að þeir sem eru í nefndinni eru þessa dagana að leita að leið til að sleppa frá hugsanlegri ábyrgð á braut handa okkur. Ef þeir finna aðferð fljótlega til að senda þetta eitthvert annað innan bæjarkerfisins gera þeir það á næstu vikum. Fróðlegt verður að sjá hvernig þeir tækla þá staðreynd að mörg minni bæjarfélög landsins, t.d. Selfoss. Þorlákshöfn, Ólafsvík, Akureyri, Grindavík, Vestmannaeyjar og fleiri á leiðinni, sýna mun meiri vilja til að halda þeirri traffík og innkomu sem fylgir íþróttum í sinni heimabyggð. Það er ljóst að með hverri keppni koma yfir 100 keppendur og aðstoðarmenn auk áhorfenda. Allir skilja eitthvað eftir í þjónustufyrirtækjum viðkomandi bæjarfélags. Á meðan verðum við að halda gryfjunum í horfinu, án þess að eyða eða reikna með of miklu í málið.
Við höldum okkar striki þó hægt fari.
MotoMos:)
Lambhagi – Fávitaháttur
Landvörður Lambhaga og nærliggjandi svæðis gaf sig á tal við umsjónarmann vefsíðunnar og talaði um miklar gróðurskemmdir. Mikil vinna hefur verið lögð í uppgræðslu sem síðan er fótum troðin í algjöru virðingarleysi af einhverjum hjólamanni / mönnum. Þetta svæði ásamt fleirum á landinu er í stuttu máli frábært hjólasvæði. Með þessu áframhaldi verða komin upp skilti þar sem hjól eru bönnuð og þegar það gerist þá eru þau komin til að vera. Svæðið er morandi í slóðum sem hreinn draumur er að keyra. Sá mikli fjöldi hjólamanna sem hefur í gegnum árin notið þessa hjólasvæðis án athugasemda og í vinsemd Landvarðar mun hálshöggva, húðfletta og tæta í sig hvern þann sem sést til eða fréttist af vera valdandi að gróðurskemmdum. Það fáránlegasta af öllu er að einmitt á þessu svæði þar sem allt er morandi í slóðum, þurfa menn að vera frekar heilalausir verði þeir valdir að skemmdum.
Vefurinn auglýsir því „open season“ á alla heilalausa og greiðir 800 krónur fyrir bensínhöndina og 270 krónur aukalega ef úlnliðurinn fylgir.