Það er þyngra en tárum taki að þurfa að gera þetta en ekkert annað er hægt í stöðunni.
Aðstæður á Klaustri eru orðnar óviðráðanlegar.  Núna er 15m/sek og askan þyrlast stanslaust upp.

Á morgun er spáð sól og þurrki – engin væta í kortunum!
Reynt hefur verið að bleyta í brautinni en það er borin von að hafa við þurkinum.

Stjórn hefur tekið þá þungu ákvörðun að AFLÝSA Klausturskeppninni í ár!  Enn hefur ekki verið ákveðið nákvæmlega hvernig haldið verður á öllum málum í þessu sambandi, en mögulega mun upprunalegur ráslisti halda sér og keppnisgjöld renni að mestu eða alfarið uppí keppnisgjöld að ári.
Fjöldi sæta hefur skipt um eigendur og við skoðum það betur á næstunni hvernig við vinnum úr því.  Enn hefur ekki unnist tími til þess að ákveða nákvæmlega hvernig þessi mál verða en við biðjum fólk um biðlund næstu dag þar til frekari ákvörðunar er að vænta.

Stjórn VÍK harmar þessa niðurstöðu en hún er óumflýjanleg í ljósi aðstæðna.

Það er líf og fjör í tengslum við keppendalistann.  Og hann hefur verið að taka breytingum á klukkustundar fresti undanfarna daga.  Hér er staðan eins og hún var kl. 13:33 í dag.
Svo fer hver að verða síðastur því ekki verður lengur tekið við breytingum/athugasemdum eftir kl. 23:00 í dag, fimmtudag.

Lesa áfram Nýjasti ráslistinn →

Til mín hringdi kona, einn aðstandenda tjaldstæðisins og var afskaplega óglöð. Hún hefur, að sögn, haft slæma reynslu af veru hjólafólks á tjaldstæðinu sem er engan veginn gott afspurnar. Samskiptamáti hennar var reyndar ekki til þess fallinn að bjóða upp á gott samstarf eða til að bjóða hjólafólk velkomið inn á svæðið. VÍK stendur fyrir keppninni á sunnudag en engu frekara skemmtanahaldi og keppendur eru því alfarið á eigin ábyrgð að keppni lokinni.

Félagið á gott samstarf við lögreglu og greiðir björgunarsveit staðarins með glöðu geði fyrir veitta aðstoð við að halda uppi röð og reglu um helgina og fram á aðfararnótt  mánudagsins. Við getum hins vegar ekki tekið ábyrgð á hegðun allra sem sækja svæðið heim.

Félagið hvetur því keppendur til að nýta sér aðstöðuna á Ásgarði, eða annars staðar en á Klaustri – nú eða hreinlega halda heim á leið strax að keppni lokinni. Þá keppendur sem gista fyrir austan hvetjum við til að vera sér og sportinu til fyrirmyndar í alla staði.

Eigum gott samstarf við alla, verslum mat, gistingu og bensín á Klaustri og eigum gleðilega og góða helgi.

Kveðja, Hrafnkell Sigtryggsson formaður Vélhjólaíþróttaklúbbsins